– डिइबी सिकारु

१,
घुमन्ते फूल
पुग्छ हजारौँ घर
चितामा एक्लै

२,
खुसीको खोज
ईन्द्रेणी संसारमा
लुक्या छ भित्र

३,
प्यासी मानव
घुट्काउँछ समुन्द्र
डुब्दछ आफैँ

४,
सयौँ बचेरा
रित्तो बुढ्यौली माउ
गुँडमा एक्लै

५,
जिस्कायो मान्छेले
लौ रिसाइन् प्रकृती
शहर स्वाहा

६,
स्यालको सभा
कुर्सीमा लुछालुछ
आमाको मासु

७,
छानो बनाउन
टाढा उडेको फूल
बिग्रियो घर

८,
चुँड्यो कोपिला
हातभरि रगत
शुन्य चित्कार

९,
प्राणी जीवन
अन्धकार रातमा
नदीको यात्रा

१०,
हाम्रो ईश्वर
अवचेतन मन
मन्दिर आफैँ

११,
हाम्रो नियति
हरियो पासपोर्ट
रातो बाकस

१२,
नेताको बोलि
त्यो सर्पको काँचुली
फेरिनु धर्म

१३,
फोर्छौँ पहाड
हाम्रा हातमा पर्छ
झिँगाको बोसो

१४,
माटोमा रोप्छौँ
अन्नका काँचा दाना
फल्छ असिना

१५,
स्याल खोकेछ
सिंहदरबारमा
बाघ तर्सियो

१६,
विद्यालयमा
गमला बनाइयो
फूल फुलेन

***

(प्रस्तुत सृजना गत जनवरी २८ तारेख मंगलबार नेपाल मुक्तक प्रतिष्ठान कोरियाले आयोजना गरेको बृहत साहित्य मेलामा स्वयम् स्रष्टाद्वारा वाचन गरिएको थियो । आजको आँगन यसै कार्यक्रम विशेष छ )